當你離開學校喺社會開始為兩餐奔走果陣，你就愈黎愈少時間去認真咁識一個新朋友。特別係啱啱開始累積經驗每間公司最多留兩三年，同事間極其量係返工果陣會傾下計，有人生日一齊食個飯，走果陣好好歡送佢咁。但有幾多同事會放工，甚至轉工之後有聯絡、有出嚟食飯、同你傾心事？可能有，但真係一個起兩個止。
當你打開電話，你發現會KEEP CONTACT嘅朋友由以往一班變一堆再變成幾個。好多時想約朋友都總會有一兩個話唔得閒，久而久之就開始冇人搞活動，大家都冇再點聚。就算難得約到一兩個朋友出嚟，大家講嘅嘢唔似之前咁嘻嘻哈哈，大多數都係呻公司上司點衰、同事幾無賴、啲客幾麻煩。除咗講嘅話題唔同，大家都唔可以好似之前咁郁啲玩通宵然後講句「最多咪聽日走堂」，食唔夠一個鐘就開始有人話聽朝有會開，然後埋單急急腳走人。以前你唔明點解睇電視咁多人放工自己飲悶酒，而家你就正正同當中個角色相差無幾。
平時同同事食LUNCH雖然有講有笑，但你知道有好多嘢都唔可以講。你知道啊A份人有幾縮骨，啊B有幾是非精，但係為咗唔得失任何人你選擇做一個乜都唔知嘅人，同大家喺餐枱上演一套虛假嘅「和平辦公室」。望住啊B對住佢平時數臭嘅C搭哂膊頭，夾埋自己件燒賣比佢，以前你會黑住面咁同隔嚟個FD講佢有幾假，但而家你只係附和啊B嘅一份子。
好多人會同你講拎個心對自己同事係死蠢，自殺，大家都會話一定要自保，唔好比自己底牌人睇。生存喺一個咁嘅地方，人只會變到城府愈嚟愈深，莫講話交心，連提起人工幾多都好似女人比人問幾歲咁。再過一排，你識人已經唔係睇佢份人點，而係睇佢咩職位、一身打扮如何、對你前途有冇幫助，朋友依個詞唔再解作老死，而係工具。曾幾何時你最討厭就係依種人，但如今依種人正正就係自己。
如果依種就係成熟嘅表現，我真係好希望我永遠幼稚。一個唔再同人交心嘅成年人生活，到底仲有啲乜嘢真正嘅快樂？我望唔透。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
*******************************************************
I feel you.
